وبدأت المذاكرة......

في كل مرحلة من مراحل الدراسة تنتهي كل سنة منها بحرب ضروس _أقصد إمتحانات_ يخوضها الطلاب مع الكتب والأقلام
ودائما ماتأتي التجليات العظيمة في تلك الفترة... يعني لازم الواحد يفكر في مستقبله وماضيه والناس اللي حواليه وتجيله أفكار جديدة وكثيرة عن أي حاجه وفي كل حاجه...

طبعا الطالب العبقري _وطبعا كل الطلبة عبقريين_ بيرمي الكتاب على جنب ويقعد يدون أفكارة اللي بتجيله أثناء المذاكرة
عشان بعد الإمتحانات يبدأ في تنفيذها ...

فضلا عن ذلك بيدأ معسكر المذاكرة... يعني مفيش حاجه أطلع غلي فيها غير الأكل.. يعتبر باكل أكتر من 5 مرات في اليوم كل ده عشان مفيش حاجه قدامي غير الأكل

غير بقى الصداقة اللي بتنزل مابين الإخوات لو بذاكر مع أخواتي أو مابين الصحاب
وكل واحد بيحكي اللي مدايقه في الجامعة وفي البيت ومين راح ومين قال ومين عاد...

وكل ده بقول بدأت المذاركرة!! بتهيألي اقول بدأ الإبداع والرغي و.....الطفاسة

وربنا يوفق كل اللي بيذاكر

كل عام وأنتم بخير

بعض الهدوووووووء

السلام عليكم... علي جنب ياسطه... ردي علي التليفون يازينب... لو سمحتي قومي ساعديني... إحنا النهاردة هناخد موضوع جديد في تاريخ مصر القديم... إزيك ياخوخه بقالي كتير مشوفتكيش... خلي حياتك بالأمل أحلي حياة وإبدأ طريقك للي تتمني لقاه... لوسمحتي هوا الاتوبيس ده بيعدي على رمسيس؟... ممكن تعمليلي كوباية شاي؟... إن شاء الله ميعادنا الخميس الجاي إوعي متجيش... يا أمي برنامج خدعوك فقالو بدأ... قومي إعملي السلطة لو سمحتي... هيا الخياطة خلصت الهدوم؟... هيا إمتحاناتنا هتبدأ إمته... إنتوا أصلا دفعة متستهلش إني أدخلها عشان كده هديكو الكتاب وانتو اتصرفو.... يا أحمد قوم صلي يلا... يا خديجه تليفون عشانك... هوا العيد هيكون يوم إيه...............................................................

ساعات الواحد بيكون نفسه يقعد لوحده مش عايز يسمع صوت مش عايز حد يكلمه مش عايز حد يطلب منه حاجه
حتي لو يقعد بين ألف واحد بس يكون كلهم ساكتين
عايز شوية هدووووووء

بس المشكلة انه مش بيلاقى الهدوء ده حتي لما بيكون في بيته وعلي سريره لازم يكون فيه مصدر إزعاج موجود في كل مكان
لذلك قررت بعد الإمتحانات إن شاء الله إنه ميعديش أسبوع غير لو خرجت في مكان هادي ممكن أروح حديقة هادية أو أقعد علي النيل شويه
عشان انعم ببعض الهدووووووووووووووووووء

أمسك عليك لسانك

قبل ما أتكلم أحب أقول إن التدوينة دي كاتباها عشان الناس الملتزميييييييين .....

بدأنا الأيام دي نعاني من طول لسان المجتمع عامة كنا قبل كده بنسمع الألفاظ البذيئة من الناس اللي في الشارع بس ونقول ربنا يهيدهم مش عارفين ان اللي بيقلوه ده غلط

بس بعدين لقينا ناس داخل الطبقة الملتزمة واللي فاهمة دينها كويس بتقول نفس الألفاظ دى

تبدأ الألفاظ بالوصف بمختلف أشكال وأسماء الحيوانات وتوصل للأباء والأجداد

فعلا ده بيحصل ومسببلي صدمة رهيبة جداااااا

يعني كلمة "منخفض" مثلا "طبعا مش بتتقال كده بس إحتراما للمدونة" بقت طبيعية خاااااالص وأي حد بيقولها لما يكون مدايق من صاحبه

وتلاقي حد بيقول أم ايه وأبو ايه بالضبط نفس الكلام اللي بنسمعه في الشارع

المفرض إن إحنا بدأنا نتعامل مع المجتمع عشان نصلح منه بس للأسف إنجرفنا معاه في الحاجات اللي المفروض علينا نصلحها فيه

بدأناها بإن الكلمه دى دحكتنى أوي لما سمعتها من واحد في الشارع وبعدين بدأت أقولها لما بكون بهرج مع أصحابي وبعدين بقت في لساني طبيييعي جدا ومش حاس إني بقول حاجه غلط

ونسينا قول الرسول عليه الصلاة والسلام" وهل يكب الناس في النار علي وجوههم إلا حصائد ألسنتهم"

والمشكله اننا نازلين بحملة راقي بأخلاقي ....يعني المفروض أكون فعلا راقي بأخلاقي قبل ما أكلم حد علي الموضوع ده

ياريت فعلا ناخد بالنا من كلامنا ونحافظ علي لسانا قبل ما يخلينا ننحدر بأخلقنا في مكان إحنا منحبش نكون فيه
كبير في عنيا يا صاحبي وفي عيون كل من شافك
لأنك عشت يا صاحبي تملي كبير باخلاقك
لو الإنسان بلا أخلاق في إيه باقي
أنا إنسان ..أنا راقي باخلاقي

الشخصية المضحية

بداية لم اقصد الشخص المضحي الشخص اللذى يضحي بنفسه وماله من أجل أصدقائه
وأقاربه فهذا الشخص أحترمه وأقدر تضحياته

وإنما أقصد بكلامي الشخص اللذى يحمي أصدقائه وأقاربه من الفتن ويقف هو في مهب الريح مضحيا بنفسه من أجل حماية الآخرين رغم أنه من الممكن أن يتأثر بتلك الفتن ويرتكب بعض المعاصي بسببها أكثر ممن يحميهم ولكنه "كشخصية مضحية" يتصرف كأنه معصوم من أن يقع في الخطأ

مثال لذلك: ثلاثة من الشبان يريدون أن يسألوا بعض الفتيات عن شيئ او أن يخبرهن بشيئ فالأول يمتنع عن ذلك مخافة على نفسه من أن يقع في معصيه"عدم غض البصر....عدم وضع حدود في الكلام....الخ"

والثاني يرى انه لابأس بذلك لأننا"زمايل" و"متقوليش إن ممكن ده يخليني أقع في معصية"

فيأتي "صاحبنا" بفصل الخطاب ويذهب هو لسؤال الفتيات عما يريد.

مثال آخر: تأتي الفتاتان لركوب الباص فتضطران إلي الجلوس بجانب رجل فتضحي "صاحبتنا" وتجلس هي بجانبه خوفا

على صاحبتها من أن يضايقها هذا الرجل ولأنها"خبيرة في التعامل مع مثل هؤلاء الرجال"

طيب نقف هنا شويه الرسول عليه الصلاة و السلام قال"الحلال بين والحرام بين وبينها أمور مشتبهات........ فمن
إتقى الشبهات فقد إستبرأ لدينه وعرضه ومن وقع في الشبهات وقع في الحرام"

أنا لم أقصد بكلامي اللذي يفعل ذلك الموقف مرة واحدة بل أقصد الشخص اللذي يعيش حياته مضحيا بنفسه ودينه بسبب

خوفه على الآخرين من أن يتعرضوا لشيئ يكون بسببه ان يقعوا في خطأ ما

طيب ايه اللي يضمنك إنك مش هتقع فيها؟؟ يعني لما تعيش حياتك بتسأل فلانه وتكلم فلانه وتدي المحاضرة لفلانه وشويه هتذاكر لفلانه وبعدييين؟؟؟؟ وصلت لفين؟؟

وإنتي لما كل يوم تتعرضي للأذي بسبب حمايتك للبنت التانية فين حمايتك لنفسك وفين خبرتك بقى؟؟

لازم ياجماعة نحافظ على نفسنا قبل أصحابنا ونحمي نفسنا قبل مانفكر نحمي حد

مش بدعو للأنانيه بس في أي حاجه صغنونة ممكن آخد بيها ذنب "ولا أعرفك"

العيد فرحه

العيد فرحه..ياسلام.. وأجمل فرحه..ياسلام

احم احم

كل سنة وأنتم طيبين..

بجد مبسوطة كتيييير عشان العيد جه عشان بعد العيد هنزل

الكلية الجديدة بتاعتي لأني لسه مش نزلتها





أجمل ما في العيد إن لينا طقوس مش بنغيرها أبدا في كل عيد

أول حاجه بنعملها في يوم العيد

بننزل نصلي العيد أنا واخواتي مع أصحابنا وبنقابل هناك قرايبنا

وطبعا لازم نكون لابسين هدوم العيد الجديدة

وبعدين بنلف علي بيوت العيلة نعيد عليهم

وبليل بنخرج مع بعض

وطبعا فى نص اليوم ربنا بيرزقنا بأطفال يقعدوا يفرقعوا صواريخ

وأنا طبعا بكون علي أعصابي عشان مش بحب الصواريخ

بس بنسيبهم عشان العيد فرحه..

أنا لسه صغيرة

السلام عليكم ورحمه الله



كنت بفكر من زمااااااااااان(من سنة كده...اصل الزمن عندى طويل قوى) اني اعمل مدونة تكون نافذه مفتوحه على اللى بفكر فيه
بس وقفت قدامي مشكله "في نظري".. إني لسه صغيرة....
وبعدين قلت بعد الثانويه بعد الثانويه... وخلصت الثانويه وكل ماافكر فى المدونة اقول لما اكبر شويه..
وعدي شهر.. شهرين.. تلاته وبعده قلت افكر فى الموضوع بجديه
بعد مافكرت كتيييييير وتعبت من التفكير قررت اني لسه صغيرة

بس برده هعمل مدونة.....